हिमालयन रि इन्स्योरेन्स

काठमाडौं। हिमालयन रिइन्स्योरेन्स लिमिटेडले रेटिङ एजेन्सी एम् बेस्टबाट हालै मात्र प्राप्त गरेको बी पलस रेटिङको मद्दतमा विदेशबाट पुनर्बीमा व्यवसाय भित्र्याउन अग्रसर भएको छ ।

सोका लागि कम्पनीले भारत, सिंगापुर, दुबई र थाइल्याण्डमा शाखा विस्तार गर्ने प्रक्रिया अगाडि बढाइरहेको छ । सो देशहरूमा शाखा विस्तार गर्न सकेमा कम्पनीलाई युरोप, मध्य पूर्व, दक्षिण पूर्व, अफ्रिका तथा अष्ट्रेलिया जस्ता प्रान्तहरूबाट पुनर्बीमा व्यवसाय भित्र्याउन मार्ग प्रशस्त हुने कम्पनीले जनाएको छ ।

भारतबाट पुनर्बीमा व्यवसाय गर्न आवश्यक एफआरएन नम्बर प्राप्त गरेको कम्पनीले भारतमा शाखा विस्तार गरेसँगै केही वर्ष भित्रै भारतबाट अन्दाजी एक करोडरुपैयाँ बराबरको पुनर्बीमा व्यवसाय भित्र्याउन सफल हुने अपेक्षा कम्पनीले लिएको छ ।

तेश्रो वार्षिक साधारण सभाले कम्पनीको चुक्ता पुँजी वृद्धि गर्ने प्रस्ताव पारित गरेसँगै कम्पनीको जोखिम वहन गरेको क्षमता समेत बढेर जाने जसको कारणले विदेशबाट पुनर्बीमा व्यवसाय भित्र्याउन थप टेवा पुग्ने देखाएको छ ।

काठमाडौं । हिमालयन रि इन्स्योरेन्सले नेपाल बीमा प्राधिकरणको लगानी निर्देशिका बमोजिम विभिन्न क्षेत्रमा लगानीको दायरा बढाएको छ । कम्पनीले बैंक तथा वित्तीय संस्थाको मुद्दती, अग्राधिकार सेयर, बण्ड, डिबेञ्चर र ऋणपत्र, सूचीकृत पब्लिक कम्पनीको सेयर र म्युचुअल फण्डहरुमा लगानी गरेको छ ।

कम्पनीले आर्थिक वर्ष २०७९/८० मा नेपाल इन्फ्रास्ट्रक्चर बैंक (निफ्रा)को सेयरमा मात्रै लगानी गरेको छ । बीमा प्राधिकरणको लगानी निर्देशिका बमोजिम सूचीकृत पब्लिक कम्पनीको सेयरमा कुल लगानीको १० प्रतिशत रकम लगानी गर्न पाउने व्यवस्था भएबमोजिम कम्पनीले गत आवमा निफ्राको सेयरमा मात्रै २ करोड ५३ लाख १६ हजार रुपैयाँ लगानी गरेको छ ।

कम्पनीले १०० रुपैयाँ फेयर भ्यालु रहेको निफ्राको सेयर प्रतिकित्ता २२४ रुपैयाँका दरमा १ लाख १३ हजार २२ कित्ता सेयर खरिद गरी लगानी गरेको हो ।

त्यस्तै, हिमालयन रि इन्स्योरेन्सले म्युचुअल फण्डमा समेत लगानी गरेको छ । नेपाल बीमा प्राधिकरणको लगानी निर्देशिका बमोजिम कुल लगानीको ५ प्रतिशत रकम नागरिक लगानी कोष तथा म्युचुअल फण्डमा लगानी गर्न पाउने व्यवस्था भएबमोजिम कम्पनीले ‘एनएमबी सुलभ इन्भेष्टमेन्ट फण्ड’को इकाईमा कुल ३ करोड ९९ लाख ६० हजार रुपैयाँ लगानी गरेको छ ।

गत वर्ष सेयरबजारमा मात्रै कम्पनीले ६ करोड ५२ लाख ७६ हजार रुपैयाँ लगानी गरेको थियो । चालु आर्थिक वर्षको दोस्रो त्रैमाससम्म कम्पनीले सूचीकृत सेयरमा लगानी ३८ प्रतिशतले घटाएको छ । गत वर्षमा ६ करोड लगानी गरेको हिमालयन रि इन्स्योरेन्सले ले चालु आवको ६ महिनासम्म सेयरबजारमा ४ करोड ७२ लाख रुपैयाँ मात्रै लगानी गरेको छ ।

बीमा प्राधिकरणले बीमा कम्पनीहरुलाई लगानीको लागि थप सहज बनाईदिएपनि बीमकहरुले लगानीको दायरा बढाउन सकेका छैनन् । प्राधिकरणले लगानी निर्देशिका संशोधन गर्दै सूचीकृत कम्पनीको सेयरमा १५ प्रतिशतसम्म लगानी गर्न पाउने व्यवस्था गरेको छ, तर बीमा कम्पनीहरुले सेयरबजारमा लगानी बढाउन सकेका छैनन् ।

काठमाडौं । हिमालयन रि इन्स्योरेन्स कम्पनीले गत आर्थिक वर्ष २०७९/०८० मा प्रमुख कार्यकारी अधिकृत (सीईओ)लाई ५ करोड ३३ लाख ४२ हजार ६२६ रुपैयाँ तलब भत्ता भुक्तानी गरेको छ ।

कम्पनीको सीईओमा चन्द्रशेखरन रहेका थिए । यो अवधिमा कम्पनीले सीईओ, नायब प्रमुख कार्यकारी अधिकृत तथा एक जना कार्यकारी निर्देशकलाई आवास सुविधा दिएको जनाएको छ । यस्तै सीईओलाई सञ्चार, दुर्घटना बिमा तथा स्वास्थ्योपचार बिमा सुविधा दिएको छ । सीईओले पाएको उक्त तलब भत्ता बापत राज्यलाई ३९ प्रतिशत कर बुझाएका छन् ।

हाल कम्पनीको सीईओमा उपासना पौडेल रहेकी छिन् । उनी कम्पनीमा असोज दोस्रो साता नियुक्त भएकी हुन् ।

कम्पनीले अन्य प्रबन्धकलाई ७ करोड ४९ लाख ४९ हजार ८२४ रुपैयाँ तलब भत्ता दिएको जनाएको छ । कम्पनीले गत आवको नाफाबाट सेयरधनीलाई ४.२१ प्रतिशत लाभांश दिने भएको छ । कम्पनीले गत आवको नाफाबाट ४ प्रतिशत बोनस र कर प्रयोजनका लागि ०.२१ प्रतिशत नगद लाभांश दिने प्रस्ताव गरेको छ ।