Market

काठमाडौं । मेरो माइक्रोफाइनान्स लघुवित्तको निष्क्रिय कर्जा उच्च दरले बढेको छ । लघुवित्तले सार्वजनिक गरेको चालु आर्थिक वर्षको दोस्रो त्रैमासिक वित्तीय विवरणअनुसार पुस मसान्तसम्म कुल कर्जामा निष्क्रिय कर्जाको अंश ७.८७ प्रतिशत पुगेको हो । गत वर्षको यसै अवधिमा यस्तो निष्क्रिय कर्जा ४.९६ प्रतिशत मात्रै थियो । कम्पनीले कुल १३ अर्ब ७८ करोड रुपैयाँ कर्जा प्रवाह गरेको छ ।

कम्पनीको खुद नाफा भने संकुचन भएको छ । गत आर्थिक वर्षको दोस्रो त्रैमासमा ६ करोड ७७ लाख रुपैयाँ खुद नाफा कमाएकोमा अहिले ६ करोड ४३ लाखमा खुम्चिएको छ । कम्पनीको वितरणयोग्य नाफा भने ६ करोड ९७ लाख रुपैयाँ छ । कम्पनीले ५ करोड २ लाख रुपैयाँ लोनलस प्रोभिजन गरेको छ । कुल निष्क्रिय कर्जामा लोनलस प्रोभिजन जम्मा ३६ प्रतिशत हो ।

काठमाडौं । सगरमाथा जलविद्युत् कम्पनीको बिक्री आम्दानीसँगै खुद नाफा बढेको छ । कम्पनीले सार्वजनिक गरेको दोस्रो त्रैमासिक वित्तीय विवरणअनुसार यस अवधिमा खुद नाफा ६ करोड ५९ लाख रुपैयाँ छ ।

गत वर्षको यसै अवधिमा कम्पनीको खुद नाफा ५ करोड ४० लाख रुपैयाँ थियो । तुलनात्मक अवधिमा कम्पनीको बिक्री आम्दानी १५ करोड ९७ लाख रुपैयाँबाट बढेर १६ करोड ३३ लाख रुपैयाँ पुगेको छ ।

कम्पनीको वार्षिक प्रतिसेयर आम्दानी १२ रुपैयाँ १३ पैसा छ भने प्रतिसेयर नेटवर्थ १११ रुपैयाँ छ । यस कम्पनीले सुपरमाइ ए जलविद्युत् आयोजना संचालन गर्दै आएको छ । बिहीबार बजार बन्द हुँदा कम्पनीको सेयर मूल्य प्रतिकित्ता ३६२ रुपैयाँ छ ।

काठमाडौं । बुधबार नेप्से परिसूचक २१.६७ अंकले घटेको छ। यसदिन नेप्से १.०२ प्रतिशतले घटेर २०९७.९३ बिन्दुमा बन्द भएको छ। बुधबारको बजारमा ५ अर्ब २९ करोड ५६ लाख ५ हजार ५७ रूपैयाँको सेयर कारोबार भएको छ। गत कारोबार दिन अर्थात् मंगलबार ५ अर्ब ५४ करोड ४२ लाख १७ हजार ५९३ रूपैयाँको सेयर कारोबार भएको थियो।

मंगलबारको तुलनामा आज कारोबार रकम २५ करोड रूपैयाँ कम हो। यस दिन ३१३ वटा धितोपत्रको १ करोड ४७ लाख ७७ हजार १२० कित्ता सेयर किनबेच भएको हो। बुधबार २९ कम्पनीको सेयर मूल्य बढेको छ भने २१५ वटाको घटेको छ। यस्तै, ३ कम्पनीको सेयर मूल्य स्थिर रहेको छ। यसदिन सामलिङ पावरको सेयरमूल्य सर्वाधिक ९.८७ प्रतिशतले बढेको छ। उक्त कम्पनीको प्रतिकित्ता मूल्य ६९० रूपैयाँ कायम भएको छ।

यस्तै, मन्दाकिनी हाइड्रोपावरको सेयरमूल्य ९.६७ प्रतिशतले बढेर प्रतिकित्ता मूल्य ४६५ रूपैयाँ पुगेको छ। मेन्छियाम हाइड्रोपावरको सेयरमूल्य सर्वाधिक ५.८७ प्रतिशतले घटेको छ। उक्त कम्पनीको सेयर मूल्य ३०९ रूपैयाँ ७० पैसा कायम भएको छ। यस्तै, स्वाभिमान लघुवित्तको सेयर मूल्य ५.७८ प्रतिशतले घटेको छ। उक्त कम्पनीको सेयर मूल्य ८८१ रूपैयाँ कायम भएको छ। बुधबार हिमालयन रिइन्स्योरेन्सको सर्वाधिक कारोबार भएको छ।

उक्त कम्पनीको प्रतिकित्ता ७१४ रूपैयाँ ६० पैसामा ६३ करोड ८७ लाख बराबरको सेयर कारोबार भएको हो। यो मूल्य अघिल्लो दिनको तुलनामा ०.७० प्रतिशत बढेको हो। सर्वाधिक सेयर खरिद–बिक्री हुने दोस्रो कम्पनीमा एनआरएन इन्फ्रास्टक्चर रहेको छ। उक्त कम्पनीको प्रतिकित्ता ६१३ रूपैयाँमा २६ करोड १ लाख रूपैयाँ बराबरको सेयर कारोबार भएको छ।

आज कारोबारमा आएका १३ वटा समूहगत परिसूचकमध्ये उत्पादन तथा प्रशोधन समूहको परिसूचक ०.१४ प्रतिशतले बढेको छ भने बाँकी सबै समूहको परिसूचक घट्दा समग्र नेप्से घटेको हो। यसदिन होटल्स तथा पर्यटन समूहको परिसूचक सर्वाधिक २.०४ प्रतिशतले घटेको हो।