काठमाडौं । ऊर्जा, जलस्रोत तथा सिँचाइमन्त्री शक्तिबहादुर बस्नेतले आउँदो १२ वर्षभित्र २९ हजार मेगावाट बिजुली राष्ट्रिय ग्रीडमा जोड्ने गरी सरकारले काम गरिरहेको बताएका छन् । शनिबार काठमाडौंमा नेपाल उद्योग व्यापार महासंघको दोस्रो साधारणसभा उद्घाटन गर्दै उनले मुलुकको ऊर्जा क्षेत्रमा अपेक्षित प्रगति देखिएको बताएका हुन् ।
सबस्टेसन, प्रसारणलाइन निर्माणलगायत पूर्वाधारमा सरकारको ध्यानकेन्द्रित रहेको उनले उल्लेख गरे । विद्युत् उत्पादनसँगै खपत वृद्धि गर्न मन्त्रिपरिषद्बाट कार्ययोजना समेत पारित भइसकेको उनले जानकारी दिए ।
पछिल्लो एक वर्षमा ५०० मेगावाट बिजुली थप भएको र आउँदो तीन महिनामा ५०० मेगावाट विद्युत् थपिने उनले बताए ।
७८ वर्षमा अढाई सय मेगावाट मात्र बिजुली उत्पादन भएको उनको भनाइ छ । पछिल्लो १५ महिनामा एक हजार मेगावाट विद्युत् उत्पादन गर्न सफल भएको उनले जिकिर गरे ।
मन्त्री बस्नेतले मुलुकलाई आर्थिक विकास र समृद्धिको दिशातर्फ अघि बढाउन नकारात्मक सोच नभई उत्साहका आवश्यक रहेकामा जोड दिए ।
