काठमाण्डौ । भारतको सेयर बजारमा आज भारी गिरावट आएको छ । आज भारतको सेयर बजार मापक सेन्सेक्स इन्डेक्स १.४९ प्रतिशत अर्थात १२७२ अंकले घटेको छ । यो गिरावटसँगै सेन्सेक्स इन्डेक्स ८४ हजार २९९ विन्दुमा सीमित बनेको छ ।
यस्तै ५० वटा कम्पनीको कारोबार हुने निफ्टी५० पनि ३६८ अंकले ओरालो लाग्दै २५ हजार ८१० विन्दुमा झरेको छ । आज सेन्सेक्समा कारोबार हुने ३० वटा कम्पनीको सेयरमध्ये २५ वटा कम्पनीको सेयरमूल्यमा गिरावट आयो भने ५ वटाको मात्रै बढ्यो ।
यस्तै निफ्टीका कारोबार भएका ५० कम्पनीमध्ये ४१ वटाको सेयरमूल्य घट्यो भने ९ वटाको मात्रै बढ्यो । आज भारतको सेयर बजारको अटो समूहमा सर्वाधिक गिरावट देखियो ।
यसअघि भारतको सेयर बजा्रले २७ सेप्टेम्बरसम्म लगातार ८ दिन अल टाइम हाईको उचाई चुमेको थियो । त्यसदिन सेन्सेक्स ८५ हजार ९७८ र निफ्टी २६ हजार २७७ विन्दुमा पुगेको थियो ।
इरान र इजरायका बीच युद्धको सम्भावनाले यतिेबला विश्व सेयर बजारमा नगेटिभ सेन्टिमेन्टको दबदबा रहेको छ । आज जापानको निक्कीमा पनि ४.८० प्रतिशतको उच्च गिरावट आएको छ ।
आज हङकङको हाङसेङ इन्डेक्स भने २.४३ प्रतिशत र चीनको सांघाई कम्पोजिट इन्डेक्स ८.०६ प्रतिशतले बढ्यो ।
चीनको सेयर बजार आज ३ हजार। ३३६ विन्दुमा पुगेको छ ।
चीनको केन्द्रीय बैंकले अर्थतन्त्रलाई उकास्न हालै मात्रै आरआरआर रेसियो ५० बेसिक प्वइन्टले र ७ दिने रिभर्स रेट २० बेसिक प्वइनटले कटौती गर्ने निर्णय गरेको थियो । यसका साथै चीनले आर्थिक पुनरुत्थानकहा लागि २८४.३ अर्ब डलरबराबरको सरकारी बोन्ड जारी गर्ने योजना समेत बनाएको छ । जसको सकारात्मक प्रभाव त्यहाँको सेयर बजारमा परेको छ ।
