अछाम। चार्ड पर्व नजिकिँदै गर्दा ऐना फाउन्डेसनले कपडा बैँक नेपालको सहकार्यमा बालबालिकालाई कपडा वितरण गरेको छ । फाउन्डेसनले आफ्नो वार्षिक परियोजना ‘चुँडिएका कोपिलाका लागि चाँड र पर्व’अन्तर्गत ३३ बालबालिकालाई कपडा वितरण गरेको हो ।
आइतबार अछाम जिल्लास्थित रामारोशन गाउँपालिकाका उपाध्यक्ष श्री सिर्जना देवी बुढाको प्रमुख आतिथ्यमा भएको कार्यक्रममा विपन्न समुदायका बालबालिकाहरूको लागि फाउन्डेसनले कपडा वितरण गरेको हो ।
चाडपर्व नजिकिँदै गर्दा स्थानीय विपन्न बालबालिकाहरूको इच्छा पुरा गर्ने सानो प्रयासस्वरुप कपडा वितरण गरिएको ऐना फाउण्डेसनका संस्थापक अध्यक्ष तिलक बहादुर बटालाले बताए । “चार्ड पर्वमा बालबालिकाहरूको सबै इच्छा त हामी पुरा गर्न सक्दैनौ तथापि उनीहरूलाई केही खुसी प्रत्याभूति बनाउने उद्देश्यले हामीले यो कार्य गरेका हौ,” अध्यक्ष बटालाले भने,”आफूले सिकेका काम र क्षमताहरू स्थानीय स्तरमा नै पुरा गर्ने उद्देश्य छ । त्यही अनुरूप सकेको केही काम गर्दै छु । आगामी दिनमा पनि यसरी सेवामा निरन्तरता दिने छु ।”
दसैँ विशेष कार्यक्रमकाबिच सम्पन्न कपडा वितरण कार्यक्रममा रामारोशन गाउँपालिकाका उपाध्यक्ष बुढा बटालाले गरेको कामप्रति सम्मान व्यक्त गरेकी थिइन् । बुढाले ऐना फाउन्डेसनले गरेको कामको प्रशंसा गर्दै बालबालिकाको क्षेत्रमा फाउन्डेसनसँग सहकार्य गर्ने प्रतिबद्धता व्यक्त गरेकी छिन् । “ऐना फाउन्डेसनले हाम्रो स्थानीय तहमा गरेको यो कार्य प्रशंसनीय छ,” उपाध्यक्ष बुढाले भनिन्, “स्थानीय स्तरबाट बालबालिकाको क्षत्रमा ऐना फाउन्डेसनसँग सहकार्य गर्न आतुर छौँ ।”