काठमाडौं । नेराष्ट्र बैङ्कले बैङ्क तथा वित्तीय संस्थाको सहभागिता विना नै ऋण लेनदेन गर्न मिल्ने गरी अनलाइन प्लेटफर्मको तयारी थालेको छ । केन्द्रीय बैङ्कले वित्तीय मध्यस्थतामा लाग्ने खर्च कटौती गर्ने तथा प्रविधिमा आधारित विश्वको पछिल्लो अभ्यासलाई अनुसरण गर्न खोजेको हो ।
दुईभन्दा बढी ऋणीले कुनै एक व्यक्तिलाई ऋण दिन सक्ने गरी पियर–टु–पियर अर्थात् पिटुपी प्लेटफर्म सञ्चालन गर्न सकिने राष्ट्र बैङ्कको अध्ययनले देखाएको छ । यस अवधारणाअन्तर्गत व्यक्ति–व्यक्ति अनलाइन प्लेटफर्ममार्फत जोडिने र उनीहरूले त्यसमार्फत ऋण दिने र लिने काम गर्छन् । यसमा लगानी गर्न चाहने र लगानी लिन चाहनेबीचको समझदारी भइ लेनदेन हुनेछ ।
केन्द्रीय बैङ्कको आर्थिक अनुसन्धान विभागले गरेको अध्ययनअनुसार पहिलो चरणमा साना कर्जा लेनदेन हुने गरी प्लेटफर्मको लाइसेन्स दिन सकिने देखिएको छ । व्यक्तिगत रूपमा ऋण दिन र लिन चाहने दुवै व्यक्तिले यो माध्यममा खाता खोल्न सक्नेछन् । लगानीका अरु क्षेत्रमा कम प्रतिफल दिने अवस्था र बैङ्कमा निक्षेपको ब्याजदरसमेत कम रहेको अवस्थामा पैसा हुनेले यस्तो माध्यम प्रयोग गरी ऋणमा लगाउन सक्नेछन्।